Universiteti Hëna e Plotë (Bedër) dhe ai i Gjirokastrës, “Eqerem Çabej”, nënshkruan sot një marrëveshje bashkëpunimi në fushën akademike dhe atë shkencore.
Në ceremoninë e nënshkrimit që u realizua në ambjentet e Universitetit Bedër, të dyja palët shprehën kënaqësinë për këtë hap bashkëpunimi mes dy institucioneve në fusha me interes të përbashkët.
Rektori i Universitetit “Hëna e Plotë” (Bedër), Dr. Ferdinand Gjana gjatë fjalës së tij vuri në dukje arritjet e deritanishme të institucionit që ai drejton dhe njëkohësisht shpalosi një përshkrim të përgjithshëm të misionit, projekteve të realizuara, dhe objektivave që ka universiteti.
Më pas rektori i Universitetit Eqerem Çabej Prof.asoc.dr Gëzim Sala, nga ana e tij pasi falenderoi rektorin e Bedër u ndal në mundësitë e bashkëpunimit mes dy universiteteve. Ai theksoi përpjekjen e vazhdueshme që Universiteti Gjirokastrës bën për ti realizuar objektivat në fushën e mësimdhënies dhe kërkimit shkencor. Pas nënshkrimit, palët shprehën edhe një herë vullnetin për të vënë në jetë, sa më shpejt që të jetë e mundur këtë marrëveshje.